如果你就是對理財保守到無信用卡，貸款又無借過的朋友，其實毋需太過擔心。要建立信貸紀錄並不複雜，跟住以下3個簡單方法，就可以幫自己建立一個正面信貸紀錄！
1. 申請信用卡或私人貸款
要建立個人信貸紀錄唔洗用劍嘅，簡簡單單為自己申請一張基本嘅信用卡或一筆私人貸款就得！雖然有啲人會對信用卡同私人貸款有負面印象，覺得係先使未來錢嘅人先會用，但只要你懂得自律，審慎咁管理開支，借錢、碌卡抑或用現金你都可以控制簽賬同貸款額，做到用得其所。呢個就係最簡單直接建立個人信貸紀錄嘅途徑。當你使用信用卡簽賬或提取貸款時，銀行或財務機構就會自動向環聯TU提供有關的信貸資料，持卡人／借貸人係唔使主動向TU申請開file㗎。
2. 準時還款
建立個人信貸紀錄之後，良好嘅信貸管理係唔少得嘅。用信用卡的話，記得準時找卡數、唔好只還min pay，同埋控制信貸額使用度；如果借私人貸款的話，亦都係要準時還款，唔好過度借貸。以上嘅提示都係正面信貸紀錄嘅基礎，一定要持之以恒keep住做，因為負面嘅紀錄，譬如逾期還款咁，會留喺個人嘅信貸紀錄長達5年咁耐㗎！
3. 勿連續申請信用卡或貸款
雖然話最好有一定的信貸紀錄，但切忌因心急建立個人信貸紀錄，就一口氣申請多張信用卡或者向多間銀行或財務機構申請私人貸款。因為金融機構喺審批信用卡或貸款申請時，都會向環聯TU查閲申請人嘅信貸報告。如果喺短時間，例如喺兩星期內，有多間機構查閲同一個人的信貸報告，機構就會解讀為申請人突然間好等錢使，反映其財務狀況可能不太穩陣。